Tanke shtesë të ushtrisë izraelite janë pozicionuar në pjesën jugore të Izraelit të martën në përgatitje për të zgjeruar më tej operacionet e tyre në Gazë ndërkohë që sulmet ndaj infrastrukturës së grupit militant palestinez Hamas dhe bombardimet ajrore përgjatë Rripit të Gazës vazhduan.
“Njësi të Komandës Jugore – ju flet komandanti. Po nisim sulmin ndaj Hamasit dhe organizatave terroriste në Rripin e Gazës. Qëllimi ynë i vetëm – fitorja. Pavarësisht se sa të gjata do të jenë luftimet, sa të vështira, nuk ka alternativë tjetër përveç fitores,” deklaroi Gjeneral-majori Yaron Finkelman, shef i Komandës jugore të Ushtrisë së Izraelit.
Deklaratat e ushtarakëve u bënë jehonë komenteve të Kryeministrit izraelit Netanyahu që kundërshtoi thirrjet ndërkombëtare për armëpushim për të mbrojtur civilët. Ai u betua të shkatërrojë grupin militant Hamas dhe aftësinë e kësaj organizate, të shpallur terroriste nga Shtetet e Bashkuara të Amerikës, për të kërcënuar Izraelin.
“Ashtu si Shtetet e Bashkuara nuk do të pajtoheshin për armëpushim pas sulmit në Pearl Harbor apo pas sulmit terrorist të 11 shtatorit, Izraeli nuk do të pajtohet për armëpushim me Hamasin pas sulmit të tmerrshëm të 7 tetorit. Thirrjet për armëpushim janë thirrje Izraelit për t’iu dorëzuar Hamasit, për t’iu dorëzuar terrorizmit, për t’iu dorëzuar barbarizmit. Nuk ka për të ndodhur,” tha Kryeministri izraelit Benjamin Netanyahu.
